ఆఫీసు మిత్రుడు వినోద్ పెళ్లి రాజమండ్రిలో అంటే అందరం వెళ్దాం అనుకున్నాం.
శని, ఆదివారాలు సెలవు రావడంతో దగ్గర ఉన్న ప్రదేశాలు తిరిగి చూడటానికి కూడా బాగుంటుంది అనుకున్నాము..
మా MCA ఫ్రెండ్ ప్రవీణ్ కూడా నాతో బయలుదేరాడు..
రాత్రి హైదరాబాద్ నుంచి రాజమండ్రికి బస్సులో బయలుదేరాం..
ఉదయాన్నే కొవ్వూరు దగ్గర మెలుకువ వచ్చింది.. ఆసియాలోనే అతిపెద్దవి అయిన వాటిలో ఒకటైన రోడ్ కం రైల్వే బ్రిడ్జి మీదుగా బస్సు రాజమండ్రి వేపు పరుగులు తీస్తుంది.. అప్పుడు గోదావరి పైన కురిసే మంచు నీటితో ముచ్చట్లు చెబుతున్నట్లుగా అనిపించిన దృశ్యం చూడముచ్చటగా చాలా బాగుంది..
ఉదయాన్నే రాజమండ్రిలో దిగగానే వినోద్ మాకు ఒక రూమ్ ఏర్పాటు చేశాడు, స్నానం చేసి తనను కలిసాం. మీరు ఇంత దూరం రావడం చాలా ఆనందంగా ఉంది చక్రి అని చెప్పాడు, మాకు తనని కలవడం అంతే ఆనందంగా అనిపించింది. తనతో కొంతసేపు మాట్లాడి రాజమహేంద్రవరం చూడటానికి బయలుదేరాం.
******
ముందుగా పుష్కరాలు ఘాట్ దగ్గరకు వెళ్ళాం,అక్కడ ప్రశాంతంగా ప్రవహిస్తున్న గోదారి తల్లి ఒడిలో భక్తులు స్నానాలు, పూజలు చేస్తున్నారు,
మేము మెట్లపైన కూర్చుని నీటపైగా వీచే చల్లని గాలిని ఆస్వాదిస్తూ రాజమండ్రికి మకుటం లాంటి బ్రిటిష్ కాలంనాటి పాత మరియు అర్ధ వృత్తాకారం లాంటి కొత్త
వంతెనల నిర్మాణాలను పరిశీలించాం.
అక్కడ నుంచి బ్రిటిష్ కాలం నాటి(సుమారు 1852) కాటన్ అనే ఇంజనీర్ నిర్మించిన ధవళేశ్వరం బ్యారేజికీ బయలుదేరాం, అది రాజమండ్రికీ సుమారు 6,7 కిలోమీటర్ల దూరంలో ఉంది..
బ్యారేజి వద్ద గౌతమ మహర్షి విగ్రహం కనపడగానే, నేను 2003 సంవత్సరంలో ఈ బ్యారేజ్ దగ్గరికి వచ్చిన జ్ఞాపకాలు ,ఆ రోజులు గుర్తుకొచ్చాయి.. అప్పుడు ఇదే ప్రాంతంలో ఇసుక తిన్నెల పైన మేము ఆడిన అంత్యాక్షరి అటలు , గోదావరిలో వెతికిన రంగు రంగు రాళ్ళు,కళ్ళముందు చిన్ననాటి జ్ఞాపకాలు ఒక్కసారి అలా మెదిలాయి. తరువాత బ్యారేజి పైన ఉన్న కాలిబాట పైన నడుచుకుంటూ గేట్లును చూస్తూ ముందుకు కదిలాం..
గోదావరి నదికి ఇరువైపులా ఉన్న వివిధ రకాల చెట్లను చూస్తే పచ్చని ప్రకృతి మాత తన కురులను (కొమ్మలను) నీటి పైన వాల్చి ఆనందిస్తుందేమో అనిపించింది..
తిరిగి బ్యారేజి క్రిందికి వచ్చి కాటన్ మ్యూజియంకి వెళ్ళాం అప్పుడు దానిని మూసివేశారు, బయట ఫ్లై ఓవర్ పైన ధవళేశ్వరం ఆనకట్టను గూర్చి వివరంగా బొమ్మలు గీశారు.. కాటన్ సుమారు 1500 కిలోమీటర్లు తన గుర్రం పైన గోదావరి గట్టు పైన తిరిగి సరి అయిన ప్రదేశాన్ని ఎంచుకొని నిర్మించాడు అంటా.. దీని వలన ఎంతో మంది గోదావరి ప్రజల కష్టాలు తీరాయి.
ఇక్కడ ఆశ్చర్యం కలిగించిన విషయం ఏంటంటే మనం తిరుపతి వెళ్లామంటే అక్కడ ఉండే ఏదైనా హోటల్ లేదా షాప్ లపైన వెంకటేశ్వర అనే పదం వచ్చే విధంగా ఉంటుంది,
శ్రీశైలం వెళితే మల్లికార్జున అనే పదం వాడతారు.. ఇక్కడ కూడా కాటన్ పేరు కూడా అలాగే వాడారు కాటన్ టాక్సీ స్టాండ్, కాటన్ ఫుడ్ పాయింట్ ఇలా... శతాబ్దంనర గడుస్తున్నా ఇంకా ఆయన పేరు ప్రజల గుండెల్లో ఉందంటే ఆయన కృషి అమోఘం కదా అనుకున్నాం...
ధవళేశ్వరం బ్యారేజ్ దగ్గరలో ఉన్న ఒక హోటల్లో భోజనం చేసి తిరిగి పుష్కర్ ఘాట్ వద్ద కు వెళ్లాం.. అక్కడ రేపు ఉదయం చేయబోయే పాపికొండలు, భద్రాచలం ప్రయాణానికి టికెట్ తీసుకున్నాము..
********
తిరిగి తిరిగి సాయంత్రం 06:00 గంటలకు పెళ్లి వద్దకు వెళ్ళాము.. ముందుగా అందరం కలిసి వినోద్ ని కలిసాము, తెల్లని పెళ్లి దుస్తులలో నవ్వుతూ పున్నమి చంద్రుడిలా కనిపించాడు వరుడు వినోద్.
సాయంత్రం 7 గంటలు నుంచి 9 గంటల వరకు పెళ్లి బాగా వైభవంగా జరిగింది..
*****
శనివారం ఉదయాన్నే ఐదు గంటలకే మెలకువ వచ్చేసింది,ఉదయం 06:30 కి పాపికొండల ప్రయాణం కోసం నేను ప్రవీణ్ ఇద్దరం కలిసి రాజమండ్రి పుష్కర్ ఘాట్ దగ్గరకు బయలుదేరాం,దగ్గరిలోని మార్కండేయ స్వామి గుడికి వెళ్ళాం.
తరువాత ఒక వాహనంలో ఉదయం 08:30 గంటలకు మా పాపికొండలు ప్రయాణం మొదలయ్యింది.. పాపికొండలు గోదావరి అందాలు గూర్చి ఏమేం పాటలు ఉన్నాయా అని నేను ప్రవీణ్ ఇద్దరం గూగుల్లో వెతికాము.. గోదావరిపైన వచ్చే పాటలు మేం వింటూ ఉంటే గోదావరి గట్టు పైన మా వాహనం బయలుదేరింది. ముందుగా మమ్మల్ని పోలవరం ప్రాజెక్టు దగ్గరికి తీసుకుని వెళ్లారు,ఈ పోలవరం ప్రాజెక్టు చూడడానికి రాష్ట్రం నలుమూలల నుంచి చాలా మంది సందర్శకులు వస్తున్నారు. పోలవరం ప్రాజెక్టు ఎలా ఉండబోతుందో అని మా మనసుల్లో ఉత్సాహం బయలుదేరింది సుమారు ఆ ప్రాజెక్టుకు కొన్ని కిలోమీటర్ల దూరం నుంచే ఎంతోమంది ప్రాజెక్టు సంభందించిన పని చేస్తున్నారు...
మా వాహనం నడిపే డ్రైవర్ అప్రాజెక్టు గూర్చి వివరంగా చెబుతూ దాని దగ్గరికి మా వాహనాన్ని పోనిచ్చాడు, 48 గేట్లతో పోలవరం ప్రాజెక్ట్ ఇంకా నిర్మాణ స్థాయిలోనే ఉంది, ఇది పూర్తవ్వాలంటే మరో ఐదు సంవత్సరాలు పడుతుంది ఏమో అనుకున్నాం.. చుట్టూ కొండల మధ్య నీటిని నిలవ ఉంచడానికి అనుకూలమైన ప్రాంతంలో దీని నిర్మాణం జరుగుతుంది...
ప్రస్తుతం ఒకే ఒక గేట్(47 వ గేట్) ఏర్పరచారు. ప్రాజెక్టు పూర్తి ఐతే ఎన్నో వేల గ్రామాలు సస్యశ్యామలం అవుతాయి, మరికొన్ని గ్రామాల మనుగడ కనుమరుగు కూడా అవుతాయి అని చెబుతున్నారు..
అక్కడి నుంచి కొంత దూరం ప్రయాణం చేసి పాపికొండలు వెళ్ళే బోటింగ్ స్టార్టింగ్ పాయింట్ కి వెళ్ళాం.
******
శనివారం కావడం వల్ల చాలామంది పాపికొండల అందాలు చూద్దామని వచ్చారు, మేము మా లాంచ్ పై అంతస్తులో కూర్చున్నాము.. జీవితంలో ఎప్పుడు లాంచీ ప్రయాణం చేయని నాకు ఎంతో ఉత్సాహంగా అనిపించింది ఆ క్షణం, తోటి ప్రయాణికులు అందరి గుండెల్లో పాపికొండల్లో చూడబోతున్న ఆనందం వారి కళ్ళల్లో కనిపిస్తుంది, అందరూ వారు రోజు చేస్తున్న పనులను మర్చిపోయి కొత్త లోకానికి ప్రయాణానికి సిద్ధమవుతున్నట్లు అనిపించింది ఆ వాతావరణం. మా లాంచీ ప్రయాణం మెల్లగా మొదలైంది.. అందరూ గోదావరి మాతకు జేజేలు పలికారు,"బోటు ప్రయాణిస్తున్న ఎడంవైపు పశ్చిమ గోదావరి కుడి వైపు తూర్పుగోదావరి అని , ఆ చుట్టుపక్కల ఎన్నో గ్రామాలు వస్తాయి కొన్ని గ్రామాలకు రోడ్ల సదుపాయం లేదంటూ వివరంగా మైక్ లో చెబుతున్నారు"
మా లాంచీ ముందుకు సాగుతూ ఉంది
మా ఆలోచనులు కూడా..
"ఇక్కడ పిల్లలు ఎలా చదువుకుంటారు, అత్యవసర పరిస్థితుల్లో హాస్పిటల్ కి ఎలా వెళ్తారు" అని నేను ప్రవీణ్ అనుకున్నాం..
*****
మా లాంచి పాపి కొండలు వైపు వెళుతుంది..
గోదావరి నది చుట్టూ ఉన్న కొండల పైన మంచు సన్నటి తెరలాగా కురుస్తుంది.. ఆ మంచుకు మునగడ తీసుకుని పడుకున్న ఏనుగులు లాగా ఆ కొండలు కంటికి అనిపిస్తున్నాయి.. కొండలు పైన తాడి చెట్లు అగ్గిపుల్లలు లాగా ఉన్నాయి..
లాంచీలో సందర్శకులకు వినోదం అందించడానికి కొన్ని డాన్స్ ప్రోగ్రామ్స్ నిర్వహించారు, ఇందులో సందర్శకుల కూడా పాల్గొనే విధంగా కార్యక్రమాలు సరదాగా ఏర్పాటు చేశారు.
ఓ వైపు ఆ వినోద కార్యక్రమాలు ఆనందిస్తూ మరోవైపు ప్రకృతి సోయగాలను చూస్తూ మేము పాపికొండలకు చేరుకున్నాం..
పాపికొండలు గురించి వివరంగా మైక్ లో చెబుతున్నారు వీటిని ఒకప్పుడు ఆ పాపిడి కొండలు అనేవారంట...
వాటిని చూసినప్పుడు మాకు అనిపించింది.
*భువిపైన దేవుడు దువ్విన ఈ అందాల పాపిడి.
గోదారమ్మ చల్లని నీటి ప్రవాహపు తాకిడి..
పచ్చని ప్రకృతి ఒడిలో గోదావరి పయనం..
కనులారా చూసి పరవశించింది మా నయనం..
అందరూ పాపికొండలు అందాన్ని చూస్తూ ప్రపంచాన్ని మరిచి పోయారు..
మరికొందరు సెల్ఫీల లో తమతో ప్రకృతిని బంధించడం లో మునిగి పోయారు
*****
మా లాంచి పేరంటాలపల్లి చేరుకుంది. అక్కడ మాకు ఒక బ్రేక్ పాయింట్ ఇచ్చారు, అక్కడ ఆశ్రమం దగ్గర ఉన్న శివుడిని దర్శించుకుని మరలా తిరిగి భద్రాచలం వెళ్ళే లాంచీ ఎక్కాము..
మా ప్రయాణంలో చుట్టుపక్కల ఉన్న ఒక్కో గ్రామం గురించి మైకులలో చెబుతున్నారు ఏ ఏ సినిమాలు ఏ ఊర్లో తీశారో చెబుతున్నారు..
పక్కన ఉన్న ఇసుక తిన్నెల మీదుగా అక్కడి వాళ్లు నడుస్తూ వెళుతున్నారు,
అక్కడున్న ప్రజలను చూస్తుంటే వీళ్ళ జీవితంలో ఉదయం నుంచి సాయంత్రం వరకు ఎప్పుడూ ఎత్తుపల్లాలతో (కష్టాలు సుఖాలు మరియు గోదావరి గట్టు ఎక్కడం దిగడం) సాగుతుందనిపించిది.
ప్రయాణంలో ఇదే చివరి మజిలీ అని మైక్ లో చెప్పారు, ఇంకా కొంచెం సేపు ఈ ప్రయాణం ఉంటే బాగుండేమో అనిపించింది..
చాలా భారంగా బ్యాగ్ లను మోసుకుంటూ ఆటలు ఆడి అలసిపోయిన చిన్న పిల్లలాగా లాంచీ దిగాం....
అక్కడి నుంచి సుమారు 80 కిలోమీటర్ల దూరం రోడ్డు ప్రయాణం చేసి సాయంత్రానికి భద్రాచలం చేరుకున్నాం..
భద్రాచల రాముడి పాటలు వింటూ రాత్రికి విశ్రాంతి తీసుకున్నాం...
*****
ఆదివారం ఉదయాన్నే భద్రాచలం రామాలయం దర్శనానికి వెళ్ళాము. సెలవు కావడం వల్ల భక్తులు బాగానే వచ్చారు సుమారు రెండు గంటల సమయం పడుతుందని చెప్పారు.. నేను , ప్రవీణ్ దర్శనం ఎంత ఆలస్యం ఐతే అంత మంచిది, ఎక్కువ సేపు మనం ఈ గొప్ప ప్రదేశంలో ఉండే అవకాశం వస్తుంది కదా అనుకున్నాం.అక్కడ గోడలపై రాసిన రామదాసు కీర్తనలను చూసాం, అర్థం చేసుకోవడానికి ప్రయత్నించాం.
ఆ తర్వాత ఆ సీతారాముని దివ్య దర్శనం బాగా జరిగింది..
గుడి గోడలపై వివరంగా గీసిన చిత్రాలను చూస్తూ దమ్మక్క ,కంచర్ల గోపన్న మరియు భద్రగిరి గా మారిన భద్రుని కథను చదివాం చర్చించుకున్నాం..
అప్పుడు నా మనసులో అనిపించింది
*నాడు ధమ్మక్క ఇచ్చిన తాటి ఫలాన్ని మొదటి నివేదనగా తీసుకున్న రాముడికి నేడు కోట్లాది తెలుగు ప్రజలు తమ హృదయాలను నివేదనగా సమర్పిస్తున్నారు కదా అని*..
తరువాత రామదాసు రాముడికి చేసిన నగలను మ్యూజియం లో చూశాము.
గుడి పక్కన ఉన్న చిత్రకూట కళాప్రాంగాణంలో రామదాసు కీర్తనలు ఆలపిస్తున్నారు. ఆ పాటలు పాడే వారిని చూస్తే ఏ పనినైనా ఏదో చేశాములే అని కాకుండా ఇంత నేర్పుగా , ఆనందిస్తూ చేయాలి అని మాకు ప్రేరణ కలిగింది..
*******
మధ్యాహ్నం 3 గంటలకు తిరిగి మా ప్రయాణం హైదరాబాద్ కు మొదలయ్యింది.. నేను ప్రయాణ వివరాలు రాస్తూ ఉన్నాను, రాత్రి 10 గంటలకు హైదరాబాద్ చేరుకున్నాం..
మొత్తానికి ఎప్పటినుంచో అనుకుంటున్న పాపికొండలు యాత్ర బాగా చేశాము..
చాలా రిఫ్రెష్ అయినా భావన నాకు కలిగింది... ఇక సోమవారం నుంచి పనిలో ఎంతో ఉత్సాహంగా పాల్గొనవచ్చు అనుకున్నా :)
