పుస్తక ప్రపంచంలోకి నా తొలి అడుగులు.

నాకు చిన్నప్పుడు ప్రతి చిన్నారి లాగే కథలు , కొత్త కొత్త వింతలు విషయాలు తెలుసుకోవాలని భలే తపన ఉండేది.ఇవన్నీ గ్రంథాలయంలో దొరుకుతాయని మా అన్న వాళ్లు చెప్పేవారు.

నాకు ఇప్పటికీ బాగా గుర్తు నేను  మొదటిసారి మా నిజాంపట్నం గ్రంథాలయానికి వెళ్ళినప్పుడు అక్కడ రకరకాల కథల పుస్తకాలను చూసినప్పుడు ఎంతో ఆనందం వేసిందో తిరునాళ్ళలో ఆట బొమ్మలను చూసిన పిల్లాడి వలె ఆనందం గుండెల్లో రెండు కళ్ళల్లో నిండిపోయింది.  రకరకాల కథలు పుస్తకాలు ముందుగా బొమ్మలు అన్నీ తిరగేసాను,ముఖ్యంగా చందమామ కథల పుస్తకం అందులోని విక్రమార్కుడు బేతాళుడు బొమ్మ నన్ను అమితంగా ఆకట్టుకుంది.

రోజూ మా స్కూల్ కి సైకిల్ పైన వెళ్తూ ఈ లైబ్రరీ వైపు చూస్తూ వెళ్ళే వాడిని, కిటికీలోంచి లైబ్రరేరియన్ ను చూసిన ప్రతిసారి ఇలా అనుకునే వాడిని
"ప్రపంచంలో ఎవరైనా అదృష్టవంతులు ఉన్నారంటే  ఈ లైబ్రేరియన్ నే కదా అని..
ఆయన చుట్టూ ఎన్నో పుస్తకాలు ఎన్నో కథలు ఎన్నో కొత్త కొత్త విషయాలు ఎంత చక్కగా చదువుకోవచ్చు.."

నా పఠనాభిలాషను గ్రంథాలయం బాగా పెంచింది. చందమామ కథలు, తెనాలి రామలింగ, అక్బర్ బీర్బల్, మర్యాద రామన్న  ,ఈనాడు హాయ్ బుజ్జి ఇవన్నీ చదువుతున్నప్పుడు ఒక కొత్త ప్రపంచంలోకి రెక్కలు కట్టుకుని నేను వెళ్ళినట్లు నాకు అనిపించేది.

ఇలా చదవడం మొదలు పెట్టగానే నేను బట్టీపట్టి చదవడం ఆపేసాను. అప్పటి నుంచి అర్థం చేసుకుని చదవడం మొదలుపెట్టాను.నా జీవితంలో ఇది నిజంగా తొలిమెట్టు చదువులో,ఏకాగ్రత లో ఎంతో మార్పు వచ్చింది.

నేను పదో తరగతి పాస్ అవ్వగానే మా నాన్న నాకు నగరం లైబ్రరీ లో చేరడానికి సభ్యత్వం ఇప్పించారు, అప్పుడు ఎంత ఆనందం వేసిందో అది జీవితంలో మర్చిపోలేని సంఘటన. ఆ వేసవి సెలవల్లో రోజు సైకిల్ పైన వెళ్లడం పుస్తకాలు ఇంటికి తెచ్చుకొని చదువుకోవడం.

అప్పటి నుంచి మొదలైన పఠనాభిలాష నేటికీ కొనసాగుతూనే ఉంది రోజూ కనీసం ఒక పేజీ ఐనా చదవడానికి ప్రయత్నిస్తాను. ఇప్పటికీ పుస్తకాన్ని నా చేతిలో తీసుకున్న ప్రతిసారి ఒక చిన్ని పసిపాపను చేతిలోకి తీసుకున్నట్లు అనిపిస్తుంది.

నాకు నచ్చిన పుస్తకాలను మిత్రులందరితో పంచుకుంటూ ఉంటాను. వారు చదివిన పుస్తకాలు కూడా తెలుసుకుని  చదువుతూ ఉంటాను, మీకు నచ్చిన పుస్తకాల పేర్లు కూడా నాతో పంచుకుంటారు కదా.

ఈ ఏడాది మా మిత్రులంతా కలిసి శనివారం పూట హైదరాబాద్ గవర్నమెంట్ పాఠశాలలో పిల్లలకు కథల పట్ల పుస్తకాల పట్ల ఆసక్తి కలిగించడానికి కొన్ని కార్యక్రమాలను కూడా మొదలుపెట్టాం. మీకు కథల పట్ల, పుస్తకాల పట్ల ఆసక్తి ఉంటే మాతో జట్టు కట్టవచ్చు, చిన్నారుల చదువుల ప్రయాణంలో భాగస్వామ్యం కావచ్చు.

 శ్రీనివాస చక్రవర్తి
11/08/2019